WEB - INFORME da Mesa Sectorial no Ministerio
O Ministerio de Educación presentou o novo borrador do Real Decreto que regulará as características do curso de formación inicial e os seus módulos de actualización, en cumprimento do establecido pola LOE, tras a súa modificación pola LOMLOE. O texto incorpora diversas achegas recibidas ao longo do proceso e está previsto que entre en vigor no curso 2026/2027.
Neste novo marco normativo recóllense determinadas equivalencias e validacións vinculadas a esta formación. A actualización correspondente deberá realizarse, nos casos que proceda, transcorridos oito anos desde a formación inicial.
Desde ANPE valórase que algunhas das propostas remitidas pola organización foron recollidas no novo texto. Con todo, mantense a solicitude de revisión doutros aspectos que non foron incluídos, como a presenza de determinados documentos no módulo relativo ao funcionamento dos centros, entre os que se atopan algúns que non existen en todas as Comunidades Autónomas, como o Proxecto Curricular. Así mesmo, insístese na necesidade de incorporar unha formación básica sobre o procedemento administrativo común e o funcionamento dos órganos colexiados das administracións públicas.
O Ministerio anunciou que o proxecto de Real Decreto recibirá unha nova redacción para afinar determinados aspectos antes de ser remitido ao Consello Escolar do Estado, órgano no que as organizacións sindicais poderán volver facer achegas ao texto.
En rogos e preguntas, ANPE solicitou información sobre a convocatoria dos grupos de traballo, en especial do grupo 4, referido ás condicións do desempeño docente (xornada lectiva, cocientes, recursos de apoio para alumnado con necesidades específicas e desburocratización). Lembrouse que o Ministerio comprometérase a convocar esta reunión para finais do mes de maio, xunto con documentación concreta para o seu estudo.
O Ministerio desculpouse polo atraso e informou de que está ultimando a documentación necesaria, prevéndose que a reunión do grupo 4 teña lugar a mediados do mes de xullo.
Así mesmo, ANPE interesouse polo estado de tramitación do Real Decreto sobre a Inspección Educativa, lembrando que o texto pasara pola Mesa e polo Consello Escolar do Estado hai case un ano, sen novas desde entón. Segundo indicou o Ministerio, este proceso continúa avanzando, aínda que a un ritmo máis lento ao non tramitarse pola vía de urxencia. Actualmente atópase en Función Pública e só resta o ditame do Consello de Estado para que poida ser aprobado polo Consello de Ministros e publicado. Estímase que este procedemento poida concluír tras o verán e, en todo caso, antes do mes de decembro. Ligazón ao borrador de outubro
