Este Real Decreto modifica o EBEP e as principais novidades son:
- A ampliación do permiso de nacemento e coidado do menor a 19 semanas, dúas das 19 semanas poderán gozarse ata que o fillo ou a filla cumpra 8 anos.
- Aumento de 26 a 32 semanas do permiso por nacemento e coidado do menor para as familias monoparentais, catro das cales poderán gozarse ata que o fillo ou a filla cumpra 8 anos
- As oito semanas do permiso parental para o coidado de fillos menores de oito anos queda establecido como non retribuído.
- A regulación introducida polo presente real decreto-lei, respecto da adición das dúas semanas, catro no caso de familias monoparentais, de suspensión do contrato de traballo ou do permiso por nacemento e coidado de menor que se poden gozar ata que o menor cumpra os oito anos de idade, será de aplicación desde o 2 de agosto de 2024, data en que cumpría o prazo para a transposición da Directiva Europea (UE) 2019/1158 do Parlamento Europeo e do Consello, do 20 de xuño de 2019, relativa á Conciliación da Vida Familiar e a Vida Profesional. Dita directiva establece a obrigatoriedade de que o permiso parental de oito semanas sexa retribuído.
- O goce das devanditas semanas de suspensión de contrato de traballo ou do permiso por nacemento e coidado de menor, así como a prestación económica correspondente, poderá solicitarse a partir do 1 de xaneiro de 2026.
ANPE valora positivamente calquera avance nas medidas de conciliación da vida familiar e profesional, pero pide que se retribúan as oito semanas do permiso parental tal e como esixe a directiva europea.